【Quote of the Day】#成為羸家的法則 #MrBusiness
「真正的贏家從不按既有的遊戲規則，而是改變或是直接創造新的規則。」— 尼亞爾‧斐茲傑惹
之前喺Social Media見到朋友寫上一句說話，印象特別深刻，”If you' re player, I'm the coach.”言簡意深，非常霸氣，疑似係對出軌男朋友嘅反擊。真正嘅贏家，從來唔會同對手打泥漿摔角，而係開一個新戰場，自己就係話事人。情場上係，商場上亦一樣。
遊戲規則，係既得利益者保護自己嘅手段。因為有得益，唔想有人破壞，所以大家最好乖乖跟規則走。而喺世界上，絕大多數都係人云亦云，願意冒險承擔風險係少數。而可以顛覆市場生態、徹底改變遊戲規則嘅人，先至有機會成為下一個贏家。
講到具破壞性創新嘅生意人，一定要數電動車生產商Tesla創辦人Elon Musk。憑領導能力，挑戰傳統嘅創業精神，以及對物理、機械、工程等領域嘅專業知識，短短幾年間，已經成功顛覆汽車界，令電動車大行其道，甚至成為後生仔dream car。電池續航力同成本，一直係電動車嘅pain point， 導致價格一直離地。不過Tesla最新公布嘅電池技術，就有辦法令生產成本降低一半，就算無政府資助下，都有望提升電動車嘅市佔率。仲有autopilot自動駕駛功能，可以預見無人駕駛係將來大趨勢，Elon Musk 絕對係成功改變遊戲規則嘅好例子。
所以我好Appreciate有人勇於試新野，就算最後失敗而回，亦都係邁向改變遊戲規則重要一步。凡事都可以輸，就是不可以輸給想法！
Search